"АРДЫН ЭЛЧ"

“Ардын Элч” хойд хилийг зорилоо

2011-09-07T20:29:00.000-07:00

“Ардын Элч” явуулын номын сан Монгол улсын хойд хилийг хамгаалж байгаа хилчин дайчдад үйлчилгээгээ хүргээд ирлээ. Энэ удаа бид Сэлэнгэ аймгийн төвд байрлах хилийн 0243, 0101-р анги болон 0243-р ангийн Номтын заставт очиж үйлчилсэн бөгөөд нүүдлийн номын сангийн үйлчилгээг хилчин дайчид баяртайгаар хүлээн авсан юм

Тэд цэргийн ангийн номын сангуудад сүүлийн жилүүдэд номын баяжилт хийгдээгүйгээс ном, соёлын үйлчилгээг хүргэх явдал дутмаг байгаа энэ үед явуулын номын сангийн үйлчилгээг нэвтрүүлсэн нь тун чухал ажил болж байна хэмээн ярьж байлаа. Явуулын номын сангийн үйл ажиллагааны хүрээнд анги тус бүрт 150 орчим номыг хүргэсэн бөгөөд тэд номуудыг заставуудад ажиллаж байгаа хилчдэд хүргэх ажлыг цаашид зохион байгуулахаар боллоо.

Мөн тус хоёр цэргийн ангийн номын сантай танилцаж, арга зүйн зөвлөгөө өгсөн юм. Номын санчид хилчдийн дунд номын хэрэгцээ тун их байдаг талаар ярьж, сүүлийн үеийн уран зохиолын болон гадаад хэлний ном хүлээн авах хүсэлтэй байгаагаа хэлж байв.

Өглөг өглөгийн дээд номоор бэлэг барив

2011-05-31T03:14:00.000-07:00

Явуулын номын сангийн хамт олон бид МҮОНТ-ийн хүүхдийн нэвтрүүлгийн уран бүтээлчидтэй хамтран эх үрсийн баярыг тохиолдуулан сургууль завсардсан хүүхдүүдийг баярлуулсан юм. Баянзүрх, Сонгинохайрхан дүүргүүдийн албан бус боловсролын “Гэгээрэл” төв дээр ажиллаж, нүүдлийн номын сангийн бас нэгэн зорилтот хэрэглэгч болох сургууль завсардсан хүүхдүүдтэй хамтдаа нэгэн өдрийг дуу хуур, баяр хөөрөн дунд өнгөрүүлсэн билээ.

Баянзүрх дүүргийн албан бус боловсролын төвд 280 хүүхэд суралцдаг бөгөөд

нийслэлийн хэмжээнд хамгийн олон сургууль завсардсан хүүхэдтэй дүүрэг аж. Тус дүүргийн албан бус боловсролын төв өөрийн гэсэн байр савгүйгээс газар газар сургалтаа зохион байгуулдаг гэнэ. Энд 5-25 хүртэлх насныхан суралцдагаас 20-с дээш насныхан бичиг үсэг үл мэдэгчдийн сургалтад хамрагддаг байна. Бидний үйл ажиллагаа 97-р сургуулийн спорт зааланд эхэлж, Гэгээрэл төвд суралцдаг бага насны хүүхдүүд оролцов. Үндэсний телевизээр гарна хэмээн хөөрч догдолсон багачууд өөрсдийн бэлтгэсэн урлагийн тоглолтоо сонирхуулж, хүүхдийн цовоо цолгин хоолойгоор дуулж, жүжиглэсэн нь үйл ажиллагааны маань шигтгээ болж байв.

Баянзүрх дүүрэг газар нутаг томтой, гэр хороолол ихтэй, шилжиж ирэгсдийн тоогоор тэргүүлдэг зэрэг шалтгааны улмаас сургууль завсардсан хүүхэд ихтэй байдаг аж. Гэгээрэл төвийн захирал Д.Дугармаа багшийн ярьснаар хөдөөнөөс шилжиж ирсэн иргэд айлын хашаа, энд тэндхийн эзэнгүй газар суурьших нь элбэг. Энэ нь өөрийн гэсэн харьяалалгүй иргэд, гэр бүлийн тоог нэмэгдүүлж, хүүхэд сургууль завсардах нэг нөхцөл болдог гэнэ. Тиймээс Баянзүрх дүүргийн “Гэгээрэл хөгжил” төв өөрийн дүүргийн газар нутагт амьдарч байгаа иргэдийн хүүхдийг бичиг баримт, харьяалал харгалзахгүй авч сургадаг буянтай ажил хийж буй нь энэ. Тус төвд суралцагсдын ихэнх хувийг орон гэргүй, өнчин өрөөсөн, нийгмийн эмзэг гэгддэг бүлгийн хүүхдүүд эзэлдэг байна. Дэлхийн зөн монгол олон улсын байгууллагаас тусламжийн гараа сунган зарим хүүхдийг орон байраар ханган амьдарч, сурах нөхцлийг бүрдүүлдэг аж.

Сурах бичгийн хувьд дүйцүүлсэн хөтөлбөрөөр явдаг боловч энэ нь хэт ерөнхий, ЕБС-ийн сурах бичигтэй харьцуулахад хангалттай мэдлэг олгож чаддаггүй ажээ. Олны дотор сурах арга барилаа хурдан олж, ЕБС-д дэвшин суралцах нөхцлийг хангасан сурагчид цөөнгүй байдаг бөгөөд эд нарт ЕБС-д хэрэглэж байгаа сурах бичиг шаардлагатай байдаг гэнэ. Тиймээс “Мөнхийн үсэг” группээс хандивласан цоо шинэхэн сурах бичгүүд тэдний эрэлт хэрэгцээнд нийцсэн бэлэг болж чадсан.

Хүүхдийн гэнэн цайлган харц, өхөөрдөм инээдээр цэнэглүүлсэн явуулын номын сан маань дараагийн өртөө болох Сонгинохайрхан дүүрэг дээр ирэхэд өмнөхөөс арай том хүүхдүүд угтав. Энэ удаагийн үйл ажиллагаа урлагийн зааланд явагдав. Түрүүчийнхтэй нэгэн адил хүүхдүүд урлагийн тоглолт үзүүлэн, бидний хамтрагч МҮОНТ-ийн “Мазаахай” нэвтрүүлгийн авьяаслаг багачууд ая дуу, шүлгээ найргаа өргөж, хүүхдийн дуу хуур цалгисан үйл ажиллагаа маань өндөрлөв. Сонгинохайрхан дүүргийн Гэгээрэл төвийн захирал Б.Батсүрэн манай тоглолтын гол дүрийн хүү өнөөдөр алга байна. Уг нь сэргэлэн авхаалжтай гэж жигтэйхэн. Ээжтэйгээ хог түүж амь зогоодог болохоор өнөөдөр боломж нь болсонгүй шиг байнаа хэмээн дурамжхан өгүүлсэн юм. Бид сурах бичгүүдээс гадна АНУ-ийн Элчин сайдын яам, Азийн сангаас хандивласан хүүхдэд зориулсан зурагт номнуудыг бэлэглэчихээд дараагийн ажилдаа оров.

Зарим дүүргийн Гэгээрэл төвүүд өөрийн гэсэн байр сууцтай тохилог гэгч нь сургалтаа явуулдаг сурагтай. Тэдний нэгэн адил дээрх төвүүд дараа эргээд очиход өөрийн гэсэн байртай, ажил үйлс нь улам гялалзаж байхын ерөөл дэвшүүлье.

Ардын элч Багануурын хориход

2011-04-20T00:27:00.000-07:00

Бид амласан ёсоороо Багануур дүүргийн Хорих 427-р ангид ажиллаад ирлээ. Явуулын номын сангийнхаа үйлчилгээг алдаж гэнэдэгсдэд туслах Шайдевег нийгэмлэг, Нийслэлийн “Улаанбаатар чуулга”-ын уран бүтээлчид, яруу найрагч Н.Гантулга, “Эх орны номын сан” нэвтрүүлгийн хөтлөгч, редактор Жаргалсайхан нартай хамтран хүргэсэн юм.
Дүүргээсээ 20-иод км-ын зайтай тус хорих анги чанга дэглэмтэйгээрээ онцлог. Биднийг очиход хорих ангийн нийгмийн ажилтан бүсгүй угтан авч, удирдлагуудтайгаа уулзуулан, ерөнхий мэдээлэл өгөв.

Хөтөлбөрөө тохиролцоод, камер луу ороход хоригдлууд олон нийтийн ажилд зориулсан танхимдаа зэрэгцэн сууцгааж байв.

Гадаах хүйтэн салхи, доторх зэврүүн уур амьсгалыг үргээж, “Улаанбаатар чуулга”-ын дуучин СТА Анхтуяа, морин хуурч Чулуунбат нар уртын дуугаа дээжилснээр үйл ажиллагаа эхэлсэн.

Хамран ажиллах гэрээнд Хорих 427-р ангийн дарга Б.Амардорж, МҮНС-ийн ахлах арга зүйч Б.Энхжаргал нар гарын үсэг зурсны дараа

“Өдрийн сонин”-ы урлаг, спорт, чөлөөт цагийн албаны дарга, яруу найрагч Гантулга ном уншихын ач холбогдлыг хүүрнэж, нэртэй уран бүтээлчдийн хорих газар шилдэг бүтээл туурвиж байсан түүхээс хуваалцаад шүлэг найргаа хүргэв.

Сэтгүүлч Жаргалсайхан хоригдлуудтай илэн далангүй ярилцаж, нэвтрүүлгийн зураг авалтаа үргэлжлүүлсээр байлаа.

Хорих ангиудын дунд зохиогдсон урлагийн наадмаас шалгарч, нэгдсэн концертод оролцсон “Хүслэн” хамтлаг сэтгэлийн бэлэг болгон ая дуугаа өргөсний дараа бид тус хорих ангийн номын сантай танилцав.

Байр сав нь боломжийн, ном уншихад тохиромжтой хэдий ч бусад хорихынхтой адил ядмагхан номын баяжилттай уг номын санг боловсрол өндөртэй байрын, дөлгөөхөн төрхтэй ах ажиллуулдаг ажээ.

Бид арга зүйн зөвлөгөө өгч, номоо танилцуулах хооронд уран бүтээлчдийн уулзалт, нэвтрүүлгийн зураг авалт ч дууслаа.

Шинэ номтой дахин уулзахаа амлаад, дурсгалын зураг татуулсны дараа хотын зүг хөдлөв.

/Дэлгэрэнгүйг 04.23-ны өдрийн 21 цагт “Эх орон” телевизээр хүлээн авч үзээрэй/

Арвидахын бэлгэт аян

2011-04-12T02:34:00.000-07:00

МҮНС-ийн Эрдэм шинжилгээний уншлагын танхимд эхэлсэн “Номын хандив” аянд хэвлэлийн газрууд, уран бүтээлчид, хувь хүмүүс оролцож 5500 орчим ном, хэвлэмэл бүтээлийн хандив өргөж, монгол түмнийг соён гэгээрүүлэх их үйлст үнэтэй хувь нэмэр оруулсанд бид бүхэн туйлын их баяртай байна.

Зохиолч Д.Оюунчимэг, Д.Батжаргал нар нээлтээс урьтаж уран бүтээлийнхээ дээжээс хандивлан, аяны дөрөөг мялаасан нь ихэд бэлгэшээлтэй хэрэг байв.

Аяны ерөнхий ивээн тэтгэгч “Мөнхийн үсэг” группын “Болор судар” хэвлэлийн газар 2000, “Соёмбо принтинг” 1084, МЗЭ 555, МҮОНРТ-ын уран бүтээлчид 500, “Сэлэнгэ пресс” 290, “Сод пресс” 271 ном тус тус хандивлаж аяныг тэргүүлэв.

Мөн “Аз хур”, “Непко паблишинг”, “Эмпати ертөнц”, “Бит пресс”, “Жеком пресс” зэрэг хэвлэлийн газрууд, “Глоб интернэшнл”, “Малчдын сан” тэргүүтэй төрийн бус байгууллага, уран бүтээлчид, хувь хүмүүс энэ аянг дэмжиж ном, гарын авлага, бусад хэвлэмэл бүтээл хандивласан юм.

Аяны нээлтэд АУЗ Т.Галсан, Ш.Сүрэнжав, Дэлхийн Урлаг соёлын академийн утга зохиолын доктор, яруу найрагч Д.Урианхай, Болор цомын эзэн найрагч Ц.Бавуудорж, Г.Мөнхцэцэг, Нацагдоржийн шагналт зохиолч Дан.Нямаа, Б.Баярсайхан, болон залуу уран бүтээлчид оролцож, санал сэтгэгдлээ хуваалцан, зохиол бүтээлээ дээжлэв. АУЗ Т.Галсан өөрийн болоод үзэг нэгт нөхдийнхөө 5 бум, 5 түм, 5 мянга, 555 төгрөгний ном хандивлаж буйгаа дуулгав. Нээлтэд ирж амжаагүй ч ном хандивлахаа уламжилсан байгууллага, уран бүтээлчдийн цуваа тасрахгүй байна. “Ардын элч” явуулын номын сангийн байнгын хандивлагчаар Мөнхийн үсэг групп, АНУ-ын Азийн сан, Малчдын сан ажиллахаа мэдэгдээд байна.

Номын цагаан буян ашид дэлгэрэх болтугай!

“Номын хандив” аян

2011-04-05T19:17:00.000-07:00

Явуулын номын сангийн үйлчилгээний эрэлт ихэсч, маш олон газраас санал ирсээр байна. “Болор судар” хэвлэлийн газрын эрхлэгч Д.Пүрэвдорж хэвлэлийн газруудын уриалан хандивын аян зохион байгуулъя гэсэн нь ч манай сонирхолтой нийцэж Монголын Үндэсний номын сан тус хэвлэлийн газартай хамтран номын хандивын аяныг эхлүүллээ.

Аяны зорилго:

“Ардын элч” явуулын номын санг ном, сонин, сэтгүүл, цахим бүтээлээр хангах, Үндэсний номын сангийн сан хөмрөгийг орчин үеийн, эрэлт хэрэгцээтэй номуудаар баяжуулах

Хэрэгцээ, шаардлага

Монгол Улсын Үндэсний номын сан 90 жилийнхээ ойг угтаж БСШУЯ, Дэлхийн банктай хамтран “Ардын элч” нүүдлийн номын сангийн төслийг эхлүүлж, амжилттай хэрэгжүүлж байна.

Орон нутагт чиглэсэн энэхүү үйлчилгээ нь алслагдсан сум дүүрэгт амьдарч буй иргэд, ажилгүйчүүд, сургууль завсардсан хүүхдүүд, хөгжлийн бэрхшээлтэй хүмүүс болон эрх чөлөөгөө хязгаарлуулсан иргэдэд номын сан, мэдээллийн бүх төрлийн үйлчилгээг хүргэж, оюуны хэрэгцээг хангахаар зорьж буй билээ. Уг үйлчилгээ гурван жилийн хугацаанд хэрэгжих бөгөөд нийслэлийн алслагдсан дүүргүүд, 21 аймагт хүрч ажиллана.

Бид Налайх дүүрэг, 014-р цэргийн анги болон Эмэгтэйчүүдийн хорих 307-р ангид “Ардын элч” номын сангийн үйлчилгээг хүргэсэн нь олны талархлыг хүлээж, орон нутаг дахь цэргийн анги, хорих газрууд, аж ахуй нэгж байгууллагууд манай үйлчилгээнд хамрагдах хүсэлтээ ихээр ирүүлж байна.

Үндэсний номын сангийн сан хөмрөгийг баяжуулж, явуулын номын сангийн үйл ажиллагааг өргөжүүлэх үүднээс энэхүү хандивын аянг зохион байгуулж байна.

Үйл ажиллагаа

ü Аяны нээлт 2011 оны 04 сарын 06-ны 11.00 цагт МҮНС-ийн Эрдэм шинжилгээний уншлагын танхимд эхэлнэ.

ü Хэвлэлийн газар, уран бүтээлч, байгууллагуудаас хандив цуглуулна.

ü Хандивын бүтээлүүдийг Багануур дүүрэг, тус дүүргийн Хорих анги, Хил хамгаалах Ерөнхий газрын харьяа хилийн цэргийн ангиуд, Эрдэнэт, Дархан хот, Булган аймгаас эхлэн шат дараатайгаар орон нутагт хүргэнэ.

ü Аймгуудын Нутгийн зөвлөл, алдартнуудтай хамтарч, тухайн бүс нутагт зориулан ном, хэвлэмэл бүтээл цуглуулж, “Ардын элч” явуулын номын сангаар дамжуулан орон нутгийн номын сангуудыг хэрэгцээт бүтээлээр хангана.

ü Их, дээд сургууль, хүрээлэнгүүдтэй хамтарч номын санд нэн шаардлагатай байгаа мэргэжлийн номуудыг цуглуулна.

Хамрах хүрээ

Хэвлэлийн газрууд, хувь уран бүтээлч, зохиолчид, төрийн болон төрийн бус байгууллагууд, их, дээд сургуулиуд, хувийн хэвшлүүд, аж ахуйн нэгж, компаниуд г.м номонд элэгтэй хэн бүхэнд манай аян нээлттэй.

Явуулын номын сан эмэгтэйчүүдийн хорих ангид

2011-04-05T19:09:00.000-07:00

Явуулын номын сангийн дараагийн өртөө Эмэгтэйчүүдийн хорих 407-р анги байлаа. Олон улсын эмэгтэйчүүдийн эрхийг хамгаалах өдрийг тохиолдуулан МҮОНТ, МЗЭ, хэвлэлийн газрууд, уран бүтээлчидтэй хамтарч номын сангийнхаа үйлчилгээг хүргэсэн минь энэ. Бид энэхүү арга хэмжээг яруу найрагч Б.Баясгалангийн санаачилж, өрнүүлсэн тус хорих ангид ном хандивлах аянтай дашлуулж өдөрлөг хэлбэрээр зохиосон.

03 сарын 07-ны өдөр явуулын номын сангийн төслийн багийнхан зохиолч, сэтгүүлчдийн хамт эмэгтэйчүүдийн хорих ангийг зорьсон. Ирж яваа цаг болохоор хотын зах руу хүлгийн жолоо залах нэн таатай.

Хорих газрын удирдлагуудтай гэрээ хийлээ

Бид үдийн хэрд зорьсон газраа хүрч, хорих газрын удирдлагуудтай уулзаж, хөтөлбөрөө тохирон, сэтгүүлчид тус ангид зураг авч, сурвалжлага хийх нарийн дэгтэй танилцсаны дараа үйл ажиллагааныхаа гол цөм болох хорих камер луу нэвтрэв. Өргөст торны цаадах намхан байшингийн “Ялтны байр” гэх хаяг бэлтгэл ажлаа базаасаар хорих байгууламжийн талаар төсөөлж ч амжаагүй явсан надад хэрдхийх сэтгэгдэл төрүүлснийг нуух юун. Урьд өмнө кинон дээрээс л хорих камерыг харж байснаас бодитоор үзээгүй хүний хувьд тийм уур амьсгал, орчин нөхцлийг мэдэрнэ гэдэг их сонин юм билээ.

Камерийн үүдэнд харгалзагч бүсгүй бидний бичиг баримтыг дахин сайтар шалгаад, дотогш оруулав. Хорих ангийнхан бид бүхний үйл ажиллагаанд зориулан тусгайлан тайз засаж, хар ажлын хувцас гэмээр саарал хүрмээр жигдэрсэн эмэгтэйчүүд эгнэн сууж, өдөрлөгийг маань тэсч ядан хүлээж байлаа.

Тайзнаа СГЗ, яруу найрагч Ш.Дулмаа, Болор цомын эзэн яруу найрагч Г.Мөнхцэцэг, Ш.Лхамноржмаа, яруу найрагч Б.Баясгалан, Чулуунцэцэг тэргүүтэй уран бүтээлчид, МҮНС-ийн дэд захирал Д.Бямбасүрэн, ахлах арга зүйч Б.Энхжаргал нар байлцаж өдөрлөг эхэлсэн. Бүсгүй найрагчдыг сонгож явсан хийгээд Лхамноржмаа найрагч хөтөлсөн нь нүдээ олсон хэрэг байв. Тэд яруу найрагч, эх хүний торгон мэдрэмжээр уур амьсгалыг зөөллөж, хэн хүний сэтгэлд хүрэхүйц залж чадсанд талархахгүй байхын аргагүй. Өдөрлөгийг нээж ангийн захирагч үг хэлсний дараа аяныг санаачлагч Баясгалан зохиогч, хандивлагчдын халуун алган дээрээс 1500 гаруй ном авчирснаа уламжлаад “Хүний бие хоригдохоос оюун ухаан хоригдохгүй. Та бүхэн эдгээр бүтээлийг уншаад цаг хугацаа, орон зайг үл хамааран оюун санаагаараа аялцгаагаарай” хэмээн, номынхоо дээжийг гардуулсан нь олны талархлыг хүлээж, бүсгүйчүүд алга нижигнүүлэн ташиж, уухайлж байв.

Түүний дараа МҮНС-ийн дэд захирал Д.Бямбасүрэн “Ардын элч” явуулын номын сангийнхаа үйлчилгээг танилцуулж, ял эдэлж буй эмэгтэйчүүдийн санал хүсэлтийг харгалзан тогтмол үйлчилж байхаа мэдэгдэхэд нүдэндээ нулимстай бүсгүйчүүдийн алга ташилт, уухайн түрлэг тасрахгүй байлаа. Тэдэнд чин сэтгэлийн уулзалт, дотоодын гадаадын шилдэг бүтээл агаар ус мэт хэрэгтэй байжээ. Тус хорих ангид ял эдэлж буй 400 гаруй эмэгтэйн талаас илүү хувь нь дээд боловсролтойгоос гадаад хэл дээр ном уншдаг нь цөөнгүй ажээ. Яруу найрагчид шүлэг найргаасаа дээжилж, СУИС-ын оюутнууд уран бүтээлээ хүргэж, баяр дээр баяр нэмсэн юм. Дуу хуур, шүлэг найраг, чин сэтгэлийн халуун үгс дор өдөрлөг маань сайхан болж, баярын нулимстай, итгэл дүүрэн харцас биднийг үдсэн билээ.

Шүүхийн шийдвэр гүйцэтгэх газрын удирдлагууд явуулын номын сангийн үйлчилгээг тасралтгүй явуулах нь хоригдол эмэгтэйчүүдийг нийгэмшүүлэх /хүншүүлэх/, зорилгод маань чухал ач холбогдолтой ажил боллоо гээд хоригдож буй хүмүүс ном уншихыг их хүсдэг эмэгтэйчүүдийн хорих төдийгүй бусад хорих ангиудад номын сан бий болгох тал дээр хамтарч ажиллаач гэсэн хүсэлт тавьсан. Та бүхний хүсэлтийг биелүүлэхийн төлөө манай номын сан ажиллана. Багануур дүүргийн хорих анги дээр эргэн уулзъя.

САЙХАН ЭХЛЭЛ БОЛ САЙХАН ҮРГЭЛЖЛЭЛИЙН ЭХЛЭЛ

2011-04-05T19:06:00.000-07:00

Монголчуудын оюун ухааны өв, үе үеийн мэргэдийн ухааны нь цараа, утга уянгын дууллыг өөртөө шингээсэн өлгий нь болох Үндэсний номын сангийн 90 жилийн их ой тохиож байна.

Их ойгоо их гэх тодотголтойгоор хийж чадахгүй ч их ажлын эхлэлийг тавьж, салхийг нь хагалсандаа номын сангийн хамт олон бид сэтгэл өөдрөг, магнай тэнэгэр байна.

Дэлхийн банкны эдийн засгийн төслөөс болон БСШУЯ-наас дэмжсэн “Ардын элч” явуулын номын сангийн үйл ажиллагаа Монголын цагаар 2011.02.26-ны өдрийн 12 цагт Үндэсний Номын Санд нээгдлээ. Ингэхдээ хана туурганы цаана, хамаг түмнээсээ далд бус, харин ч иргэдийнхээ нүдэн дээр, их эрдэмтэн Б.Ринчен гүүшийнхээ өсгий дор нээгдлээ. Нээлтийн үйл ажиллагаа нүдэнд үл өртөм даруухан болсон ч “Өнөөдрийн жижиг эхлэлээс хожмын том үр дагавар гардаг” гэдэг.

Явуулын номын сангийн нээлтийн ажиллагаа

Энэ үеэр БСШУ-ны сайд Ё.Отгонбаяр, МҮНС-ийн захирал Х.Чилаажав нар үг хэлж явуулын номын сангийн үйл ажиллагааг нээж тууз хайчилсан. Их өргөөний үүдэнд таслагдсан энэ тууз монголын мянга мянган иргэдийн оюуны цангааг тайлах цэнгэг булгийн эхлэл, тэр тууз онож хэлэхийн гайхамшигт мэргэдийнхээ сүнсийг одот тэнгэрээс бууж ирэхийг даллан дуудсан хэнгэрэг ч юм бил үү.

“Ардын элч” гуншинтай явуулын номын сангийн оньсон тэрэг, нээж хэлсэн үг нь замхарч, мялаалгын цагаан сүү нь царцаж амжаагүй байхад анхны аялалаа алслагдсан дүүрэг болох Налайх руу залав.

Налайх, 30 мянга орчим хүн амтай мөртлөө ажилгүйдэл, ядуурал ихтэй.

Налайх, 21900 номтой, нийтэд үйлчилдэг ганц номын сантай атал тэдгээр ном хэвлэлийн ихэнх нь агуулгын хувьд хуучирч, хоцрогдсон.

Налайхын номын сан, 2008 оноос хойш номын баяжилт хийгдээгүй, номын сангийн үйл ажиллагаанд зориулсан төсөвгүйн улмаас уншигч, ном олголтын тоо хангалтгүй, үүнийгээ дагаад мэдээлэл соёлын үйлчилгээ ихээхэн доголдож, номын санд иргэдийн оюуны хэрэгцээг хангахуйц ном хэвлэлгүй. Иргэд ном хэвлэл уншиж, хэрэгцээт мэдээллээ авч чадахгүй байгаа тул явуулын номын санг бүх талаар дэмжиж, дүүргийнхээ ард иргэдэд явуулын номын сангийн үйлчилгээг тэгш, хүртээмжтэй, өргөн цар хүрээтэй хүргэх талаар идэвхтэй хамтран ажиллана гэдгээ дүүргийн удирдлагууд илэрхийлсэн.

Маркетинг менежмент, сурган хүмүүжүүлэх ухаан, уран зохиол, мал аж ахуйн сэдэвт номыг сонирхон хайгсад олон байгаа талаар номын санч н.Эрдэнэчимэг ярина билээ.

Дээрх учир шалтгаануудын үүднээс бид Явуулын номын сангийн эхний үйлчилгээг 2011.02.26-ны өдөр Налайх дүүргийн хүн ам, тус дүүрэгт орших цэргийн 014-р ангид хүргэсэн нь энэ.

Налайх дүүргийн Соёлын төвтэй хамтран ажиллах гэрээнд гарын үсэг зурлаа

“Ардын элч”-ийг Налайх дүүргийн ЗДТГ-ын мэргэжилтэн н.Баттулга, Соёл Урлагийн Ордны дарга н.Баасанхүү нар сайхан хүлээж авсан шүү.

Үндэсний номын сангийн дэд захирал Д.Бямбасүрэн “Ардын элч” явуулын номын сангийн ач холбогдол, зорилгыг танилцуулж холбогдох хүмүүстэй санал сэтгэгдлээ солилцон, цаашид хамтран ажиллах гэрээнд гарын үсэг зурсан.

Иргэд “Ардын элч”-ийг ирсэнд талархаж буйгаа илэрхийлж, сүүлийн үеийн уран зохиолын болон орчуулгын бүтээлүүд, эрүүл мэнд, амьдрах ухаан, мал аж ахуйн чиглэлийн ном хэвлэлийг түлхүү сонирхон уншиж байсныг дурьдууштай.

Налайх дүүргийн иргэд

Зэвсэгт хүчний 014 дүгээр ангийн бие бүрэлдэхүүнд 58 ном хэвлэл хүргэсэн. Эх орон, ард түмнийхээ амгалан тайван байдлын төлөө энэ биеэ зориулахад хэзээд бэлхэн тангараг өргөсөн эр цэргүүдийн маань нар нь гарах шиг болно билээ. Дараа дахин очихдоо илүү сонирхолтой, олон ном ганзгална гээд манай багийнхан ам алдчихсан. Бид гэхдээ хий хоосон амлаагүй, анхны ажил, анхны үйлчлүүлэгчид гэхээр айдастай явсан, чин үнэнийг хэлчихье. Гэсэн ч хүмүүсийн хандлага, сэтгэлийн үгс, нүдний харц, үйл хөдлөл энэ бүхэн бидэнд ямар ч эмнээс илүүтэй, ямар ч саад тотгорыг үл ажрах эрч хүч өгсөн болохоор, урмын сэтгэлээ үл дийлээд энэхүү үгс амнаас уначихсан.

Цагтаа цалгиж гэдэг шиг хэдхээн жилийн өмнө дүүрэг нэрэндээ томдмоор хөгжил, хөдөлмөрч иргэдээр

бялхаж, хөл хөдлөгөөнөөр цалгиж байсан энэ газар өнөөдөр уурхай шигээ нам гүмхэн болжээ. Ёстой л нүднээс гарна гэдэг болж.

Налайх дүүргийн цэргийн ангид

Бид уурхайг нь ажиллуулж, нүүрсийг нь олборлоод энэ хотыг хот шиг хот болгож өгнө гэж амлаж чадахгүй. Бид хүрз бариад амьдарч болдоггүй юм бол ном уншаад, мэдлэг боловсрол эзэмшээд хотоо өөд нь татна гэж шазуур зуун өгүүлэх иргэдийн хэрэгцээг чадан ядан хангаж, хүсэлдээ хүрэхэд нь нэг гишгүүр болж өгнө гэдгээ амлъя. Сайхан эхлэл бол сайхан үргэлжлэлийн эхлэл биш гэж үү.

Хүлээ, бид дараа танай нутагт очно...